- 746 -

1449. Juli 22. Liegnitz.

Herzogin Elisabeth entscheidet zwischen der Stadt Liegnitz und den Gebrüdern Gotsche und Hannos Schoffe von Greiffenstein um allerlei Schuld, Forderungen und Ansprüche.

Wir Elisabeth von gotis gnaden herczogynn inn Slesien vnd frawe zcu Legnicz vnd zum Goltberg bekennen vffuntlichen mit diesem brieffe vor allen den, die en sehn, horen ader lesen, das wir als eyn follmechtig korrichter der hernach geschriben teile dy erbarn vnd tuchtigen Gotschen vnd Hannosen Schoffe gebrudere von Greyffensteyne vor sich vnd vor Ulrichen vnd Jeronimen iren vnkegenwertigen brudern vnd alle andere ire geswistryde, der sy sich gemechtiget haben off eynem vnd dy ersamen . . ratmanne vnser stat Legnicz vor sich vnd dy obgenante stat offim andern teile vmbe alle sachenn, schulde, vorderunge vnd czusproche, dy sy czuenander gehabit haben ader haben mochtenn, bis hiher vonwannen dy czukomen weren, keyne awszgenomen, gancz gar vnd entlich vorrichtet vnd entscheidenn haben vnd sondirlichen vmbe die czehen marg geldis jerliches czinses, dy dy obgenante vnser stat Legnicz had uff dem gutte Hermanszdorff, dy ir fetter Hannosz Gotsche offinn Kynaste doruff vorschribenn had, sollin sy en geben czehn marg vor alle vorsessene czinse off sand Michels tag nestkomenden vnd forbasmer sollen vnsere rathmanne soliche ire czinse doselbist gerulich haben, heben vnd empfaen von den Gotschen, egenanten, iren erbin vnd nachkomen vnd eynem ydemanne vngehindert nach lawte ires brieffs vormalis dorobir gegebin, den wir krefftigenn vnd bestetigen in krafft diesz brieffes. Solichen entscheid vnd awssprach haben bey de teile vor vns also globit stete, feste vnd vnuorbrachen czuhalden bey trawen vnd eren ane allis arg vnd intrag. Czugeczugnis vnd bestetigunge haben wir vnser ingesegil an diesen briffe lossen hengen, der do gegebin ist czu Legnicz noch Cristi vnsers herren geburth tawsent vierhundert vnd dornach im newnvndvierczigsten jare an sante Marie Magdalenen tag. Dobey sind gewest der gestrenge vnd vnsir lieben getrawenn herren Cristoff Dornheim ritter, Nicklesch Dornheim seyn bruder, Adam Slegil hewptmann vff Parchwicz, Hanns Abscatsch vnd herre Johannes Girdan techand czu Legnicz.

O. d. St. L. No. 398. Siegel wie zuvor.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866